نیوزی لینڈ کیخلاف پاکستان کی 16 رکنی ون ڈے ٹیم کا اعلان کردیا گیا۔ 

تفصیلات کے مطابق نیوزی لینڈ کے خلاف ون ڈے سیریز  کیلئے 16رکنی قومی اسکواڈ کا اعلان کردیا گیا ہے۔ چیف سلیکٹر شاہد آفریدی نے کہا ہے کہ  نیوزی لینڈ کے خلاف ون ڈے سیریز میں بابر اعظم کپتا ن ہوں گے ،ایک کھلاڑی ٹیسٹ میں پرفارم کر رہا ہے ٹی 20 میں پرفارم نہیں کرتا تو نکال دیا جاتا ہے۔ کپتان کو تمام آپشنز دے رہے ہیں، جب وہ ٹیم بنائیں گے سب کھلاڑی اس وقت کھیل چکے ہوں گے۔

شاہد آفریدی نے اعلان کیا کہ 16 رکنی اسکواڈ میں شاہنواز دھانی ،محمد حسنین اورشان مسعود شامل ہوں گے ۔ اس کے علاوہ محمد نواز، محمد رضوان، وسیم جونیئر، نسیم شاہ، سلمان علی آغا، طیب طاہر، اسامہ میر بھی ٹیم  کا حصہ ہیں۔ جبکہ فخر زمان ،امام الحق، حارث روف ،حارث سہیل ،کامران غلا م  بھی فائنل 16 میں شامل ہیں ۔

پریس کانفرنس کے دوران چیف سلیکٹر شاہد آفریدی نے کہا کہ یہ ایک ایسی کرسی ہے کہ اکثر لوگ ناراض ہوں گے ، میں سب کو خوش بھی نہیں کرسکتا۔میرٹ  پر فیصلے کئے ہیں، کسی کو نہیں بھولیں گے۔

انہوں نے مزید کہا کہ ڈومیسٹک سیزن کے وقت تمام پلیئرز کا کھیلنا ضروری ہے۔جہاں موقع ملے اچھی کرکٹ کھیلنی چاہیے تاکہ نظروں میں رہیں۔لیگ میں شرکت کرنے سے پہلے ڈومیسٹک کرکٹ اہمیت رکھتی ہے۔کھلاڑیوں کو پاکستان کی کرکٹ کو اہمیت دینا ہوگی۔

شاہد آفریدی کا کہنا ہے کہ پی ایس ایل شروع ہونے سے 10 دن پہلے سب کو فری ہونے کا کہا ہے۔ کھلاڑیوں کو لیگز کھیلنے کے لیے این او سی ملنا چاہیے۔ایک پیج کا مطلب ہر فیصلہ میں ایک ہونا ضروری نہیں ،ہماری الگ الگ ذمہ داریاں ہیں، وہ الگ الگ لے کر چلیں