وزیراعظم کے مشیر قمرزمان کائرہ کاکہنا ہے کہ امریکا کے تعلقات ہمارے ساتھ اچھے نہیں مگر ہمیں  آگے جھکنا نہیں، عمران خان نے امریکا اور سعودیہ سے تعلقات خراب کیے، آج بلاول بھٹو  وزیر خارجہ بن کر عالمی دنیا سے تعلقات بہتر بنارہے ہیں۔

قمرزمان کائرہ کا سکھر میں میڈیا سے گفتگو میں کہنا تھا کہ کیا الیکشن کرانے، قانون اور آئین بنانے سے جمہوریت آجاتی ہے؟ ادارے کھڑے کرنے سے عمارتیں بنانے سے جمہوریت نہیں آتی۔ پاکستان مشکل دور سے گزر رہا ہے اس لیے مشکل  فیصلے کرنا پڑیں گے۔9 ہزار ارب پاکستان کی آمدنی اور14 ہزار ارب پاکستان کا خرچہ ہے۔ مارکیٹ 8 بجے بند کرنے سے 100 ارب روپے سالانہ بچت ہوتی ہے مگر مارکیٹس بند کرنے کو کاروباری حضرات تیار نہیں جب کہ ورک لوڈ کم کرنےکے لیے 20 فیصدگھر سےکام کرنےکی بات کی تو تنقید کی گئی۔