مسلم لیگ ق کے سربراہ چودھری شجاعت نے عمران خان کو اسمبلیوں میں واپس آنے کی دعوت دیتے ہوئے کہا کہ عمران خان سمیت سب کو اسمبلی میں واپس آنا چاہیے سب ملکر چلنا ہوگا ۔

تفصیلات کےمطابق مسلم لیگ ق کے صدر چودھری شجاعت حسین نے پاکستانی  نژاد امریکی کاروباری شخصیت نوید انور چوہدری کے اعزاز میں ظہرانہ دیا ،وفاقی وزیر طارق بشیر چیمہ ، سینیٹر مشاہد حسین سید اور چودھری شافع حسین سمیت دیگر سیاسی شخصیات نے شرکت کی ۔اس موقع پر چودھری شجاعت نے میڈیا سے گفتگو کرتے ہوئے کہا کہ ملک میں سیاسی و معاشی استحکام ناگزیر ہے ۔ آئندہ عام انتخابات اپنے مقررہ وقت پر ہونے چاہئیں ۔ ہم سب پاکستان کے لیے کام کریں گے تو بچ جائیں گے ۔

چودھری شجاعت نے مزید کہا ہے کہ نہ فوج نے آنا ہے نہ کسی اور نے اگر یہ وقت گزر گیا تو پھر کسی کے ہاتھ نہیں آئے گا ،عمران خان سمیت سب کو اسمبلی میں واپس آنا چاہیے  ۔ عوام نے انہیں منتخب کرکے بھیجا ہے وہ دیکھ رہے ہیں کہ ہمارے نمائندے کیا کررہے ہیں  ۔ اگر انہوں نے صرف تنخواہ اور دیگر مراعات لینی ہیں تو اس کا کچھ فائدہ نہیں ہے  ۔

چودھری شجاعت نے مزید کہا کہ اگر ہم اکٹھے نہ ہوئے تو سب کی تباہی ہوگی  ۔ ہم سمجھ جائیں گے تو آئی ایم ایف پیسے دے گا  ۔ اگر ہم نے سیاست کو نہ سنبھالا تو ایک پیسہ نہیں آئے گا ۔ کیا انتخابات مہنگائی بیروزگاری کے خاتمہ میں مددگار ثابت ہوسکتے ہیں ؟۔