اسلام آباد۔3دسمبر (اے پی پی):وزیراعظم محمد شہباز شریف نے پاکستان مسلم لیگ (ن) شعبہ خواتین کی سابق صدر سینئر پارلیمنٹیرین بیگم نجمہ حمید کی وفات پر افسوس اور تعزیت کا اظہار کرتے ہوئے کہاہے کہ آئین کی سربلندی، جمہوریت، ملک اور پارٹی کے لئے بہن نجمہ حمید کی خدمات ناقابل فراموش ہیں ۔

ہفتہ کو وزیر اعظم میڈیا آفس کی جانب سے جاری بیان میں وزیر اعظم نے کہا کہ بیگم نجمہ حمید ایک نظریاتی، بااصول، بہادر، شفیق اور باوفا شخصیت تھیں ۔ انہوں نے اظہار تاسف کرتے ہوئے کہا کہ میں آج ایک محبت کرنے والی مخلص بہن سے محروم ہوگیا ہوں۔

وزیر اعظم محمد شہباز شریف نے کہا کہ مرحومہ پارٹی کا قیمتی اثاثہ تھیں۔ ان کی وفات بڑا نقصان ہے ۔ وہ قائد محمد نواز شریف اور مرحومہ بیگم کلثوم صاحبہ کی قریبی اور بااعتماد ساتھی تھیں۔ وزیر اعظم نے کہا کہ مرحومہ بیگم کلثوم کی سیاسی جدوجہد میں انہوں نے نہایت جرآت وبہادری سے ناقابل فراموش کردار ادا کیا۔

وزیراعظم محمد شہباز شریف نے طاہرہ اورنگزیب اور وفاقی وزیر اطلاعات و نشریات مریم اورنگزیب سمیت تمام اہل خانہ سے تعزیت اور ہمدردی کا اظہار کیا۔ وزیراعظم محمد شہباز شریف نے مرحومہ کے درجات کی بلندی اور لواحقین کے لئے صبر جمیل کی دعا بھی کی