کیا آرٹیکل 14 کی شق صرف ریاست کے طاقتوروں پر لاگو ہوتی ہے؟ عمران خان

لاہور : پی ٹی آئی رہنماء کا کہنا ہے کہ اعظم سواتی کے خلاف 15 ایف آئی آر درج کردی گئیں، آئین کے آرٹیکل 14 سے مراد انسان کے وقار کی ناقابل تسخیریت ہے۔

تحریک انصاف کے سربراہ عمران خان نے سماجی میڈیا پر جاری بیان میں کہا کہ ویڈیو کے ذریعے سینیٹر اعظم سواتی کی تذلیل کی گئی۔ انہیں برہنہ کیا گیا، تشدد کیا گیا۔ کئی ہفتوں سے اعظم سواتی نے سپریم کورٹ سے انصاف کی درخواست کی۔ کوئی فائدہ نہیں ہوا۔

انہوں نے مزید کہا کہ جب غصے اور مایوسی کا اظہار کیا گیا تو انہیں جیل میں ڈال دیا گیا۔ پورے ملک میں اعظم سواتی کے خلاف 15 ایف آئی آر درج کردی گئیں۔ معزز جج صاحبان سے پوچھتا ہوں کہ اس سب میں انصاف کہاں ہے؟

یہ بھی پڑھیں : سینیٹر اعظم سواتی نے اپنے خلاف درج مقدمات کیخلاف اسلام آباد ہائیکورٹ سے رجوع کرلیا

ان کا کہنا تھا کہ کیا آرٹیکل 14 کی شق طاقتور ریاستی عہدیداروں کیلئے منتخب طور پر لاگو کی جائے گی؟ آئین کے آرٹیکل 14 سے مراد انسان کے وقار کی ناقابل تسخیریت ہے۔

عمران خان نے کہا کہ معزز سپریم کورٹ کے جج سے سوال ہے کہ کیا یہ شق صرف ریاست کے طاقتوروں پر لاگو ہوتی ہے؛ باقی سب کے لیے ان کے بنیادی انسانی وقار کا کوئی تحفظ نہیں ہوتا؟